بابراعظم ایڈم گلکرسٹ کی ڈریم ورلڈ الیون کے ٹاپ 5 کھلاڑیوں میں شامل

دبئی: (کوہ نورنیوز،ویب ڈیسک) سابق آسٹریلوی کرکٹر ایڈم گلکرسٹ نے ٹی 20 انٹرنیشنل کے ٹاپ 5 کھلاڑیوں کی فہرست میں بابراعظم کو بھی شامل کرلیا۔ آئندہ ماہ آسٹریلیا میں شروع ہونے والے ٹی 20 ورلڈ کپ سے قبل سابق وکٹ کیپر بیٹر ایڈم گلکرسٹ نے ڈریم ورلڈ الیون کیلئے ٹاپ 5 ٹی 20 کھلاڑیوں کا انتخاب کیا ہے جس میں پہلے نمبر پر آسٹریلوی جارحانہ بیٹر ڈیوڈ وارنر کو قرار دیتے ہوئے گلکرسٹ نے کہا کہ وارنر ایک اٹیکنگ کرکٹر ہے اور جارحانہ کرکٹ کھیلتے ہوئے ٹیم کیلئے جاندار آغاز کرتے ہیں۔ ایڈم گلکرسٹ نے ٹاپ فائیو کی فہرست میں پاکستانی کپتان بابراعظم کو دوسرے نمبر پر منتخب کرتے ہوئے کہا کہ بابراعظم ورسٹائل کرکٹر ہے جو ہر فارمیٹ میں بہترین کارکردگی دکھا رہے ہیں، میرے خیال میں وہ ہر طرح کی کنڈیشنز میں پرفارم کرنے کی صلاحیت رکھتے ہیں۔ گلکرسٹ کی فہرست میں تیسرے نمبر پر بھارتی آل راؤنڈر ہاردیک پانڈیا، چوتھے نمبر پر افغانستان کے لیگ سپنر راشد خان اور ٹاپ فائیو کے پانچویں نمبر پر انگلش کپتان جوز بٹلر شامل ہیں۔