برازیل: دو اسکولوں میں فائرنگ سے بچی اور دو خواتین ہلاک

برازیل : (ویب ڈیسک) برازیل کی ریاست اسپریٹو سانٹو کے دو مختلف اسکولوں میں فائرنگ کے واقعات میں بچی سمیت تین افراد ہلاک ہوگئے۔ غیر ملکی میڈیا کے مطابق گزشتہ روز مسلح شخص نے ریاست کے دو مختلف اسکولوں میں گھس کر فائرنگ کی اور طلبہ سمیت اساتذہ کو بھی نشانہ بنایا جس کے نتیجے میں ایک بچی اور دو خواتین ہلاک ہوگئیں۔ میڈیا رپورٹس کے مطابق سی سی ٹی وی میں مسلح شخص کو خودکار ہتھیار کے ساتھ دیکھا گیا جس نے فوجی وردی زیب تن کر رکھی تھی اور چہرے کو ڈھانپا ہوا تھا۔ پولیس کا کہنا ہےکہ سی سی ٹی وی کی مدد سے ملزم کو گرفتار کرلیا گیا ہے تاہم ابھی اس کی شناخت ظاہر نہیں کی گئی ہے ۔ ادھر مقامی میڈیا کا بتانا ہے کہ حملہ آور کی عمر 16 سال کے لگ بھگ ہے۔