ممبئی:(ویب ڈیسک) انڈین پریمئیر لیگ کی فرنچائز چنئی سپر کنگز کے کپتان مہندرا سنگھ دھونی نے اپنی ریٹائرمنٹ کے حوالے سے اہم اعلان کردیا۔ پیر کو کھیلے گئے فائنل میں ایم ایس دھونی کی چنئی سپر کنگز نے گجرات ٹائٹنز کو سنسنی خیز مقابلے کے بعد 5 وکٹوں سے شکست دے کر پانچویں مرتبہ آئی پی ایل ٹرافی اٹھالی۔ تاہم میچ کے بعد میزبان ہرشا بھوگلے سے گفتگو میں دھونی نے کہا کہ اس وقت اپنی ریٹائرمنٹ کا اعلان کرنا آسان اور اچھا ہوگا لیکن وہ اگلے 9ماہ تک ٹریننگ کرنا چاہتے ہیں اور مداحوں کے لیے 'تحفے' کے طور پر اگلے سیزن میں کھیلنے کے خواہشمند ہیں۔دھونی نے ہرشا بھوگلے کی جانب سے دبے الفاظ میں پوچھے جانے والے سوال پر کہا 'آپ جواب تلاش کر رہے ہیں؟ جیسے کہ آپ دیکھ سکتے ہیں کہ حالات کے مطابق میرے لیے ریٹائرمنٹ کا اعلان کرنے کا یہ بہترین وقت ہے'۔ ایم ایس دھونی نے کہا 'لیکن اس سال میں جہاں بھی رہا، مجھے جتنا پیار اور محبت لوگوں کی جانب سے ملی، میرے خیال میں میرے لیے انہیں شکریہ کہنا آسان ہوگا جب کہ آئندہ 9ماہ سخت محنت ، ٹریننگ کرکے ان کے لیے کم سے کم ایک اور آئی پی ایل کا سال کھیلنا مشکل ہوگا'۔انہوں نے مزید کہا 'یہ سب میری جسمانی صحت پر منحصر ہے لیکن یہ میری طرف سے مداحوں کے لیے تحفہ ہوگا کہ میں ان کے لیے ایک اور آئی پی ایل کا سیزن کھیلوں گا، یہ میرے لیے بالکل آسان نہیں لیکن یہ میرے فینز کے لیے تحفہ ہوگا'۔
