اسلام آباد:(کوہ نور نیوز) وفاقی وزیر خزانہ اسحاق ڈار نے پٹرولیم مصنوعات کی قیمتوں میں کمی کا اعلان کردیا۔اسحاق ڈار نے پٹرول کی قیمت میں آٹھ ، ڈیزل اور لائٹ ڈیزل میں پانچ پانچ روپے فی لٹر کمی کردی۔ انہوں نے اعلان کیا کہ نئی قیمتوں کا اطلاق یکم جون رات 12 بجے سے ہوگا اور یہ 15 جون تک قائم رہیں گی۔ نیوز کانفرنس سے خطاب کرتے ہوئے کہا کہ پچھلی دفعہ پٹرول کی قیمت میں 12 روپے کی کمی کی گئی جس میں مزید آٹھ روپے کم کیے جا رہے ہیں یوں اس کی مجموعی قیمت 20 روپے کم ہوگئی ہے۔ پٹرول کی فی لٹر قیمت 270 سے کم کرکے 262 روپے کردی گئی۔ انہوں نے بتایا کہ ڈیزل کی قیمت میں پچھلی دفعہ 30 روپے کی کمی کی تھی اور اب اس میں مزید 5 روپے کم کردیے گئے ہیں۔ اب ڈیزل 258 روپے سے کم ہو کر 253 روپے فی لٹر ہوگیا ہے۔لائٹ ڈیزل میں پانچ روپے کی کمی کرکے اس کی نئی قیمت 150 روپے 68 پیسے سے 145 روپے 68 پیسے کردی گئی ہے۔ انہوں نے کہا کہ مٹی کے تیل 164 روپے سات پیسے پر برقرار رہے گی۔
