دبئی:(ویب ڈیسک) دبئی حکومت کی طرف سے موسم گرما میں پاکستانی سیاحوں کو راغب کرنے کے لیے نئی مہم کا آغاز کر دیا۔ نیوز ویب سائٹ’پروپاکستانی‘ کے مطابق دبئی کے محکمہ اکانومی اینڈ ٹورازم (ڈی ای ٹی) کی طرف سے پاکستانی سیاحوں کے لیے شروع کی گئی اس مہم کو ’چلو دبئی‘ کا نام دیا گیا ہے۔ اس مہم میں پہلی بار اردو زبان میں فنکاروں کی ویڈیوز جاری کی جائیں گی جو پاکستانیوں کو دبئی آنے کی ترغیب دیتے نظر آئیں گے۔ رپورٹ کے مطابق ان ویڈیوز میں پاکستانی سیاحوں کو بتانے کی کوشش کی جائے گی کہ دبئی چھٹیاں گزارنے کے لیے ایک فیملی جگہ ہے جہاں بے شمار بین الاقوامی معیار کے حامل پرکشش سیاحتی مقامات ہیں اور اِن ڈور اور آﺅٹ ڈور تفریح کے بھرپور مواقع ہیں۔ وڈیوز میں شہر کے منفرد تجربات کو دکھایا جائے گا اور سیاحتی مقامات پر فیملی ماحول کو اجاگر کرنے کی کوشش کی جائے گی تاکہ فیملی سمیت سیاحت کے لیے آنے والے پاکستانیوں کو اپنی طرف راغب کیا جا سکے۔ اس تشہیری مہم میں دی فاﺅنٹین، ایٹ دی ٹاپ برج خلیفہ، لیگولینڈ دبئی پارک، عجائب گھر، اے وائی اے یونیورس اور سکائی ویوز آبزرویٹر سمیت درجنوں مقامات دکھائے جائیں گے۔
